LIVE TV
ഇന്‍സ്റ്റഗ്രാം റീലുകള്‍ കണ്ടുകൊണ്ടിരിക്കുമ്പോള്‍ അപ്രതീക്ഷിതമായൊരു കാഴ്ച മുന്നിലെത്തിയാല്‍ എന്തായിരിക്കും നിങ്ങളുടെ പ്രതികരണം?. അത്തരത്തില്‍ കൗതുകവും ആശ്ചര്യവും ഒരുപോലെ സൃഷ്ടിക്കുന്നതാണ് ആറടി നീളമുള്ള പാമ്പിന്റേതെന്ന് അവകാശപ്പെടുന്ന ഒരു ഇന്‍സ്റ്റഗ്രാം വീഡിയോ. വൈദ്യുതി തൂണിലൂടെ മുകളിലേക്ക് ഇഴഞ്ഞുകയറി ഒരു പക്ഷിയെ പിടിക്കാന്‍ ശ്രമിക്കുന്ന പാമ്പിന്റെ ദൃശ്യങ്ങളാണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ചയാകുന്നത്.
വീഡിയോയില്‍ വൈദ്യുതി തൂണിന് മുകളിലുള്ള പക്ഷിയെ ലക്ഷ്യമാക്കി പാമ്പ് പതുക്കെ മുകളിലേക്ക് കയറുന്നതാണ് കാണുന്നത്. പാമ്പ് അടുത്തെത്തിയതോടെ പക്ഷി രക്ഷപ്പെടാന്‍ ശ്രമിക്കുന്നതും ദൃശ്യങ്ങളിലുണ്ട്. എന്നാല്‍ കഥ അവിടെ അവസാനിക്കുന്നില്ല. വൈദ്യുതിക്കമ്പികളുമായി സമ്പര്‍ക്കത്തിലാകുന്നതോടെ പാമ്പിന് വൈദ്യുതാഘാതമേല്‍ക്കുന്നതായും തുടര്‍ന്ന് താഴേക്ക് വീഴുന്നതായും വീഡിയോയില്‍ കാണാം.
സാധാരണയായി നിലത്തുകൂടിയും മരക്കൊമ്പുകളിലൂടെയും ഇഴഞ്ഞാണ് പാമ്പുകളെ കാണാറുള്ളത്. എന്നാല്‍ ഇവിടെ വൈദ്യുതി തൂണിലൂടെ പാമ്പ് കയറുന്ന ഈ ദൃശ്യം പലരെയും അമ്പരപ്പിച്ചിരിക്കുകയാണ്. പക്ഷിയെ പിടിക്കാനുള്ള ശ്രമത്തിനിടെ ഇത്തരമൊരു അപകടകരമായ സാഹചര്യം ഉണ്ടാകുന്നതാണ് വീഡിയോയെ കൂടുതല്‍ ശ്രദ്ധേയമാക്കുന്നത്. എന്നാല്‍ വീഡിയോ വൈറലായതോടെ മറ്റൊരു ചോദ്യവും ഉയരുകയാണ്. ഇത്രയും അസാധാരണമായൊരു സംഭവം യഥാര്‍ഥത്തില്‍ നടന്നതാണോ എന്നത്.
വീഡിയോയുടെ ആധികാരികതയെക്കുറിച്ചാണ് ഇപ്പോള്‍ സോഷ്യല്‍ മീഡിയയില്‍ പ്രധാനമായും ചര്‍ച്ച നടക്കുന്നത്. ചിലര്‍ ദൃശ്യങ്ങള്‍ യഥാര്‍ഥമാണെന്ന് വിശ്വസിക്കുമ്പോള്‍ മറ്റുചിലര്‍ ഇത് നിര്‍മിതബുദ്ധിയുടെ (AI) സഹായത്തോടെ സൃഷ്ടിച്ചതാകാമെന്ന അഭിപ്രായമുള്ളവരാണ്. ഇന്നത്തെ കാലത്ത് എഐ ഉപയോഗിച്ച് യഥാര്‍ഥ ദൃശ്യങ്ങളെന്ന് തോന്നിപ്പിക്കുന്ന വീഡിയോകള്‍ എളുപ്പത്തില്‍ സൃഷ്ടിക്കാനാകും. പക്ഷേ ഒരു വീഡിയോ അസാധാരണമായി തോന്നുന്നു എന്നതുകൊണ്ടുമാത്രം അത് വ്യാജമാണെന്ന് പറയാനാകില്ല. അതുപോലെ ദൃശ്യങ്ങള്‍ യഥാര്‍ഥമാണെന്ന് ഉറപ്പിക്കാനും കൂടുതല്‍ പരിശോധന ആവശ്യമാണ്. നിലവില്‍ ഈ പാമ്പിന്റെ വീഡിയോ യഥാര്‍ഥമാണോ എഐ നിര്‍മിതമാണോ എന്ന കാര്യത്തില്‍ വ്യക്തമായ സ്ഥിരീകരണമില്ല.
Content Highlights :A six-foot-long snake climbs an electricity pole to catch its prey. Are these visuals, which have gone viral on social media, real or the creation of AI
